Médam, Mésyé, La Sosyété koz èk moin sé koz èk in kouyon mé sé o pyé d’lo mir k’i oi lo mason. Sa i rapèl amoin mon parkour dopi moin la trap mon konésans, ziska pli tar pli tar mèm.. Mi rapèl dann tan-la moin téi yèm alé lékol. Pou kosa ? Pars sirman moin téi réisi bien dann tout matyèr épi pétète galman pars moin té pli for k’in bonpé. Konm moin l’avé la réisite, moin l’avé l’anvi é konm moin l’avé l’anvi moin l’avé la réisite. Ziska k’in zour, mi koné pa pou koué moin la kalé é moin la préfèr fé l’intérésan. Donk moin l’avé pi la réisite, donk moin l’avé pi l’anvi é konm moin l’avé pi l’anvi moin l’avé pi la réisite. Mon paran l’avé bo kriyé, dispité, ménasé, pini, sa téi fé pi arien ditou é sa la spass ziska k’in zour mi koné pa pou koué l’anvi la rotourné é avèk l’anvi la réisite, é avèk la réisite l’anvi. Alé ! Mi kite azot rofléshi la dsi é si zot néna zanfan sansa pti zanfan kalkil bien, rofléshi bien é pétète zot va trouv la klé i rouvèr la sérir lo siksé, épi la réisite. Mi kite azot rofléshi la dsi é ni artrouv pli d’van. Sipétadyé .
NB-Néna in provèrb i di konmsa : « Bèf la soif i boir, bèf la pa soif i boir pa é vèrsi vèrsa. »