Sak in bon pé ignor, mi sipoze, sé ké souvan défoi, dé zané avan, komité santral noute parti l’avé lokazyon di son dé mo la dsi. Mi souvien d’sa konm yèr, kan nou la anparl lo train, kan nou la anparl la mézon bande sivilizassion, kan la anparl la route tamarin épi in kantité d’zafèr. Mi rapèl ossi kan nou téi réinir an group travaye pou anparl dévlopman La Rényon.

Lo tan mi di azot lété konmsa é fransh vérité mi rogrète pa pars sak nou téi vé k’i fé, Paul Vergès étan prézidan La réjyon la komans fé. Lé vré déssèrtin la abate nout dévlopman an plin vol é sak nou la sinploman antrevu nu la pa gingn oir anshévé.

Mé Paul Vergès épi la diréksyon nout parti, bann militan, la lèss sa an éritaz pou lo pèp rényoné é sak la kassé lé possib réparé, é sak l’arété lé possib rodémaré. Mézami si zot i ékoute bien bann kandida, sirman zot va rokonète sak lo parti kominis l’avé di k’i fo fé é sanm pou mwin néna poin d’ote shomin pou trape lo dévlopman – li mèm la klé pou l’anploi issi La rényon – li mèm tayé pou éloign la mizèr.

Alor sak i pans parti kominis lé mor, mi diré azot tourn sète foi zot lang dann zot boush. Parti kominis lé bien vivan par son zidé pou tir La Rényon dann malpassé. Avèk son zidé épi son bande projé pou mète noute péi épi noute pèp anlèr.

A bon ékoutèr. Salu.

Justin