Mi pans kozman-la sa in kozman provèrb bannzil komor mé mi pans moin la fine vi ali dann bann provèrb in bonpé péi l’afrik. Si ni baz dsi lo sans prop, la pa difisil pou konprann ali : si i anvoye in kastrol lo bouyant dsi in mir, i fé pal o mir arien. Sa é vré sirtou si lo mir lé an béton, sansa si li lé fé avèk pyèr artifisyèl. Si lo mir lé fé avèk la tèr damé, par l’fète la tèr rouj i vo myé pa fé sa souvan pars momandoné la tèr damé va komans izé é afors izé lo mir li mèm va fini par fonn par plas donk gingn lo shok. Mé si ni baz dsi lo sans figiré i vé dir sinploman si ou i mète aou an kolèr, tro an kolèr, ébin ou i fé pa pèr pèrsone épi out l’ènmi i kass pi la tète pou out ménas, si ou i ménas. Sa i vé dir anou la kolèr la pa in prèv dé fors mé la plipar d’tan in prèv féblèss. Alé ! Mi kite azot rofléshi la dsi éni artrouv pli d’van. Sipétadyé !