Défandu shanté, défandu siflé, défandu koze for. Ou téi sava pa fé sa, alé oir dopi granmatin Zézikri apré mor pou nou. Antouléka ziska troizèr l’aprémidi kan Zézi la pouss in kri i vé dire li té mor dsi la kroi. Mi panss zot i roviv in pé, dann zote tète, lanbyans dann tan-la.

Nou marmaye dann tan-la, mwin la di azot zour-la té in zour difissil pou nou é antanssyon otan d’zanfan l’avé otan d’ père zorèye pou antande, otan d’boush pou raporté. Sé konmsa ké mon frère Alain – di Tiline – la foute in kou d’siflète. Toute suite mi di avèk momon : Tiline la siflé ! Momon i toize noute de ép i di : « Alain i fo pa siflé zordi ! » mé, konm i di la kozman téi sar d’in sanss é lo roprosh, lo vré, lo roprosh an silanss, téi sava dann in n’ote.

Lo kozman té pou Alain, mé lo roprosh lété – d’apré mwin-pou mwin pars « raporté »konm zot i koné sé in vilin défo. Mé mi panss la réakssyon mon momon téi sava pli lwin k’sa. Pli lwin oussa, mi koné pa oziss mé sak mi koné sé ké mwin la pass in movèze zourné sète ané-la. Ma konssyans pétète ? In fiziye k’ i tire dann koin.