Dë pèp i pé ète parèye kan wi rogarde bande zéléman matèryèl, mé inn é l’ot i pé alé dann dë dirékssion diféran par l’fète inn é l’ote i rotrouv pa zot dann mèm karfour listoir momandoné. Maurice lété otonome épi indépandan, pars Langlétèr, momandoné, la désside kass son lanpir kolonyal. La Rényon la domande départman franssé é aprésa li la zamé gingn lotonomi, ni lindépandans pars La franss la désside konsèrv son bande konféti — an kontroparti la donn anou in réjyonalizassion k’i mète anou dann lété ni lé zordi.

Poitan i pé pa dir la pa luté pou gingn lotonomi : la lité, la done zarguman, la fé kanpagn, la répréssion la marsh a-fon, mé la pa ariv o bite. Pou kossa ? Pars té i mank anou bande zéléman matèryèl pou trape noute lotonomi ? Mi panss pa. Mi panss mèm toute bande zéléman matèryèl lété réini. E noute sityassion i zistifyé noute lotonomi é an pliss lété dann nout lintéré mé pa dann sète lékonomoi d’kontoir.

Ni pé domande anou pou kossa. Lé vré La franss, droite konm gosh, la zamé aksèp sa. Mé anpliss, l’opinion rényonèz la zamé domande sa dann son majorité. Lé vré l’avé la droite rényonèz, lé vré la fé la frode éléktoral épi la répréssion mé l’avé in n’afèr k’i manké é pou mwin sé inn konsyans lidantité rényonèze mazoritèr dann lo péi. Rézilta la loi d’départmantalizassion ? Pétète. Nou téi domande l’égalité sossyal é opliss nou téi avanss ladan, opliss lété difissil pou bonpé abandone lo bande zavantaz !

Ni pé dir bande départmantalist l’amène in kanpagn mantèr : loton omi égal lindépandans ; lotonomi sé la fin bande zavantaz sossio étoute in kantité trikaz épi mansonz. L’avé Michel Debré.
Ni pé domande si la pa pars nou la gingn la départmantalizassion avan ké nou la pa gingn lotonomi apré. Pars kan nou la domande lotonomi nou la mète a avanss dann bande konkète la départmantalizassion — dousman dousman mé nou l’avanss kant mèm — é opliss nou téi gingn, opliss té difissil pou bonpé d’moune pou alé dann sanss lotonomi.

Mwin lé pa sir sak mi di, mé ni pé kant mèm diskite la dsu. La konsyans majoritèr noute lidantité rényonèz ala pétète sak la manké momandoné — A bon ékoutèr salu.

Justin