Mi rapèl, nana bien lontan, in shanson bann z’étidyan té i fé z’ot z’étid dann Pari l’avé fé. Son parol téi port dsi la vi dir pou bann z’étidyan é pou bann moun étranj dann gran vil-la. Donk dann shanson-la l’avé in kozman konmsa : « Souvan, la kord i pète koté li lé faye ; Déor lo van la plui l’asasine solèy ». Pars lé bien vré dann tout z’afèr nana poin for avèk poin fèb é lo koté ké la kord i pé kasé la pa in sogré pou pèrsone, sé l’androi li lé pli izé. Dizon dann tout kékshoz i fo méfyé lo poin fèb : sé lo poin va sèd an promyé, é si na lo shok pou prann sé par raport l’androi-la. Si mi tronp pa, in zour moin la lir dann in liv Mao-tsé-dong : baz dsi out poin for, mé konpans out poin fèb. Mi pans sa in bon prinsip, in klé pou rouvèr la port lo siksé. Ni artrouv !