Fitintan, mi kroiyé dann in sossyété an bone santé moral, momandoné noré poin bann délinkan é la loi kissoi natirèl osinonsa sossyal téi sifi pou évite bann déli, bann krime, bann lanprofitaz, é toute zafèr ni yèm pa kan i ariv. L’om la invante bann rolijyon pars li téi kroi la pèr Bondyé téi sifi pou anbar shomin la délinkanss. Bann sossyété la invante bann règloman pou viv korèk an sossyté.

Mé konm i di néna touzour grin d’bébé dann panyé d’mayi é si wi vé wi pé sèye diminyé la délinkanss mé la délinkanss zéro sé in n’afèr k’i égziss pa. Sé pou sa l’om la invante la pinission, la ropréssion, é lo kontrèr la rékonpanss mé toussala sa i fonkssyone pa konm in lète a la poste… Mi arète in kou tèr-la pou dir in sossyété parfète i égziss pa, l’om, lo fam, lo zanfan parfé konte pa dsi, sa la poin é la sossyété, osinonsa l’éta i doi organiz ali an konsékanss.

Sé konmsa kan wi fé in kolèj avèk plizyèr santène kolézien, plizyèr dizène zadilt pou ankadré ou lé siréssèrtin néna dé shoz pou arivé mèm si wi vé pa k’i ariv… Somenn passé in pti jenn fiye douzan la ménass sa proféssère avèk in kouto — koman èl la fé pou rante avèk in kouto ? — alé oir koméla néna lo bann téknik k’i fo pou anpèsh aèl rantre dann kolèj.

Wala ké bann radio, bann télé, bann demoune la mète a anparl sa konmsi sé in n’afèr i pé pa arivé mé lé bien domaz sa i pé arivé, la prèv ! É oila ké toute inn bann i mète a jakassé la dsi konm pou dir sète afèr-la i pé pa arivé é sirtou pou diaboliz in rolizyon osinonsa in ote.

In tan téi mète bann sirvéyan an kantité dann kolèj osinonsa dan lissé, é opliss i sava, opliss lo nonm sirvéyan i diminyé dann in sossyété plizanpliss danzéré i diminyé sak lé sharjé aporte in pé la sékirité… Toussa pou diminyé linpo dsi bann rish, pou la zénèss sère son sintir é pou fé tonm inpé dann kivète sistématikman.

A bon antandèr, salu !

Justin