L’uefa la désign ali konm arbite santral dann lo match rant PSG épi Aston villa é sa i apèl la superkoup l’uefa é sa va éspass moi d’out ki vien. Pou kossa ? Pars malgré son zènaz li lé konsidéré konm inn an parmi bann méyèr arbite ké néna. I pé dir ankor li fé parti la list bann méyèr larbite la FIFA dopi l’ané 2018- li l’avé solman vinn-sizan..

Dann son karyèr li la fine diriz in bonpé gran match é sé pou sa la dézign ali konm arbite pou la koup di mond 2026 é sé pou sa li la pran l’avion pou li alé dann l’Amérik pou fèr son travaye pandan tout in moi pars la koup di mond foutbol va dir in moi.

Mé wala, gouvèrnman lé z’usa i vé pa dli dsi téritoir amérikin donk ala lo boug ékspilsé par in déssizyon bann sèrviss amérikin mé pou kèl rézon ? An fète pèrsone i koné pa é mèm lo prézidan Trump li ossi li koné pa mé li panss pou in n’afèr grav — in afèr grav pèrsone i koné pa !!!. Donk kékshoz ni pé apèl san rézon-arbitrèr si zot i vé, kaziman karaktéryèl — é sa i azoute ankor bann déssizyon san rézon l’Amérik la pran kont bann zafrikin, bann péi l’amérik di sid.

Anfin wala sak in gran péi démokratik i fé é li la pa bézwin zistifyé ali. Initil dir azot kan Omar l’a riv dann son péi demoune an foul la bate la min pou li é li la di proshène koup di mond li sar la pou arbite bann match. Espèron so kou issi sar pa dann in péi néna in prézidan malélvé, mal profité, malédiké konm Trump.

A bon antandèr salu !

Justin