Konm bonpé dmoune issi mwin lé zanfan plantèr é mèm mon papa lété sindikaliss plantèr é li la pass in bonpé d’son tan pou défann son proféssion, son prodikssion, épi son péi finalman.

Mwin lé fine dir kann sé inn shanss pou nou, a kondission i amenn lé shoz konm i fo. In zour m’a anparl la kane pars pou nou LaRényon sa sé inn shanss é m panss bonpé plantèr i doi panss konmsa é sa i aporte la prèv son rézilyanss.. Osinonsa l’avé pi in sèl pyé. Antouléka sé konmsa k’mi panss.

An atandan mi vé parl d’inn fète. In fète ni sa pa rovoir shak ané par raporte la sityassion mé mi rapèl bien kan l’avé bèf sharète, lo dèrnyé transpor téi mète in gayar bouké dsi la tète lo bèf é téi falé oir koman bèf té fyèr épi lo plantèr ossi… Apré kan la transporte kabnn in kamion lété dsi la kabine téi mète lo bouké.

Mi koné pa koman sa i sava pass sète ané, mé si i fé in fète sirésèrtin sar in fète kèr lour, in fète kèr trist.

Justin