Plantèr lé fatigué, mé kontan, é sirtou avèk in trézorri a flo pou in kou dan l’ané. Pa pou lontan biensir, mé kant mèm lo tan pou fé in kado son madam, in tan pou ashté linj pou marmaye, in tan pou répar in pé la kaz avan la sézon dé plui i déklansh.

Apré o tan sharète, lo tan kamion dé tone sink lété lo bon tan galman. Sé dsi la kabine téi mète lo gayar bouké flèr é mèm dan la soufranss kamion téi klaksone pou di toulmoune la koupe la bien éspassé. Lé vré lo profi la parti sirtou dann la kèss krédi agrikol mé lo plantèr ossi li la gingn son kote par.

Sète ané mwin la pa vi in sèl bouké flèr. Mi di pa la pa mète dsu traktèr mé mi panss pa bande plantèr l’avé lo kèr a la fète. 1,3 milyon tone kann e sinploman avèk in dogré d’rishèss moiyin mé néna poin de koi gonf lo pla. Ankor in foi zot i rotourn dsi léta pou rofé la trézorri mé l’éta konm zot i koné sa sé in gran prométér mé pti donèr.

Li sava anons in moné d’soutien pou plantèr, mé kansa sa i sava tonbé. Bande sindikalist i koné avèk giouvèrnman i fo pa fyé : larzan-la sa i ariv arpa a tan pars dan gouvèrnman néna bande déssidèr é lo bande déssidèr i pran zot tan konm pou fé oir zot lé inportan.

La sézon 2023 sar méyèr ké sète 2022, konte touzour, mé fyé pa tro, kann nout l’or vèr lé vré, mé koméla sirtou noute gongon d’mizèr.

A bon ékoutèr salu !

Justin