Minis bann péi l’Outre-mèr, l’èr k’i lé, la fine rotourn dan la Frans. Li la pa anons arien pou la lit kont la vi shèr. Lé normal vi k’sé in promyé kontak. Mi pans kant mèm, konm prézidan Konsèy réjyonal la Guadloup, li l’avé sirman son bann dosyé la dsi, épi sirman son bann z’idé dan son tèt, ou sinonsa dsi papyé. Li la promèt, gouvèrnman i sava pran in pé désizyon, kansréti pou réspèk la parol prézidan la Répiblik. Ni atann épi nou va oir, mé ni fé kant mèm romarké, nout parti nana son z’idé la dsi é pa arienk zordi, é lé kant mèm bon koz èk li.

Solman, m’a dir azot in n’afèr : moin pèrsonèl, mi èm pa tro i koup lo bann problèm an morso : la vi shèr in koté, l’anploi l’ot koté, la formasyon in n’ot bor, étsétéra, étsétéra, la ké lo ra. Ek in korné konféti, i ar-fé pa in fèy papyé. Si té i domann amoin, moin noré di mi profèr in plan global, pars san an avoir pas par l’ékol politéknik, ni konpran bien tout bann problèm lé mayé inn avèk l’ot. Inn i pèz dsi l’ot épi résiprokman. Si zot mémoir la poin lo trou konm fromaz griyèr dodan, i fo k’i arvien azot tout z’étid, épi prozé nout parti la fine fèr. L’inkonvényan, nou la pa gingn fé aplik nout bann plan, a-suiv, pandan lo tan té i fo pou fé démar in foi pou inn bone foi nout dévlopman.

In n’afèr ni pé di lo nouvo gouvèrnman, sé d’rogard in pé déryèr, rogard in pé dann rétrovizèr pou bien konprann kosa la marshé, kosa la pa marshé, kèl l’érèr la fé, kèl bon l’inisyativ la pran momandoné. Pou koué. Pars si i fé pa in bon bilan, si i mèt pa tout dsi la tab, si i fé pa in bon l’éspèrtiz, lé riskab arfé la kouyonad. La kouyonad ? Nou Rényoné, nou lé ragoulé èk sa !

Justin