Zot i koné, nou Rénioné, néna in bon pé zafèr nou la pèr, ni krin, nou na la krintiv, ni moul poiv vèy pa koman ; An parmi, nana siklone, nana gro mèr, la maladi, la mortalité, la guèr, nana lonm invizib, loto rouz, é la fanm san tète. Bann zansien té i anparl souvan la grip éspagnol : i fo kroir sa in n’afèr la tromatiz anou vèy pa koman.

Zisteman, mi sort trouv dann zournal in kékshoz déssi so mové grip-la. Dann mon kèr, moin té i di : « si i anparl, sé k’li lariv ankor in kou ! ». Mé non ! si i anparl, sé par rapor inn-dé savan la parti fé lanaliz sak i rèst dann kor bann moun la gingn maladi-la. É pou kossa banna i sava fé sa ? Pars bann demoun savan l’apré sèy kalkilé si in mové maladi konmsa lé riskab arvnir, sansa inn aproshan, pars zot i koné sa la tié par-la sinkant milion dmoun... alor si li arvien, kèl kalité déga, mon dié ségnèr, li lé kapab fé ?
Kossa, zot i pans nora poin déga ? Pars zot i kroi médsin lé pli for k’la maladi ? Zot i pé révé, mé a s’ki paré, si in lépidémi konmsa i ariv, demoun va mor konm moush par dizènn, par santènn, par milié d’milié, par milion d’milion. Oui mon kouzin !

Alor i di : “sépa si nora le tan invant in vaksin, sépa si nora le tan invant in bon médikaman. Zot i kroi i fo may bann zoizo tèl fason banna i gingn pa fout anou la pèst, pars sé par bann zoizo la grip éspagnol la déklaré !”. Éya ka !
Bon ! Éspéron bann doktèr la grip éspagnol lé in pé pli for k’bann doktèr sikoungounia ; I fo éspéré, mé lé pa sir ditou... pars la kouyonis, sa nana partou.

Justin