Mi koné pa si lé vré mé antouléka i rosanm bien k’sé sa. Prézidan Macron d’apré sak mi antrovoi, lé mandaté par bann milyardèr pou démont lo sistèm protéksyon sosyal dopi la fin la guèr trantnèf-karantsink. In pé i di pou détrikote la protéksyon sosyal konm in n’afèr ou i démont maye par maye ziska lo zintéré bann milyardèr lé sové.

In n’ot politik lé posib. Par ébzanp, fé pèye bann rish pou soulaz bann pov, mé la pa shomin-la gouvèrnman la pran ? Rapèl anou inn-dé désizyon : momandoné li la désid raz la pint bann rotrété pou finans son politik, arzout èk sa li la désid tir sink éro dsi l’alokasyon lozman bann zétidyan, an pliskésa momandoné li la promète siprime la taks labitasyon pou fé ranplas par in n’ot san siprimé pou l’instan, rapèl azot koman la rotoush grav linpo dsi la fortine. Mi arète tèrla, mé nout tout la pa obliy bann mézir antisosyal gouvèrnman-la la pran.

Astèr gouvèrnman épi lo prézidan i profite a fon la kriz sanitèr pou bayone lo droi. Kisa i sava manifès par dis ? Kisa i sava kriy avèk in mask ? Kisa i sava roganiz manifèstasyon kan la fine fé gingn ali la trouye Covid 19 ? Pa tro loinn nou, laba dann la Répiblik Moris de moun i manifès par kantité mé isi épi mèm dan La frans si néna manifèstasyon lé in pé rikiki si tèlman demoun i rann azot kont zot l’avnir lé riskab ète boushé pou in bout tan.

In bonpé i di : La kriz sanitèr, manzé bénite pou bann fosoiyèr lo droi sosyal. Lé vré an touléka i diré k’lé vré, mé pou konbienn tan ? Tansyon pangar : afors alé a lo, kalbass i pète.