Témoignages - Journal fondé le 5 mai 1944
par le Dr Raymond Vergès

Lakey lo sit > Chroniques > Oté

La kriz sanitère konm révélatèr d’in monde par plass an disloké

vandrodi 25 zwin 2021, sanm Justin

Mézami kan la tère sar pi konm la tère koméla, kan lo monde sar pi konm lo monde koméla, kan bande zom di fitir-sansa d’ote kalité kréatir – nora anvi konète kossa la éspassé dann tan la kovid, mwin lé sirésèrtin nora in vré bataye, in lafrontman rante lopinyon lé z’inn épi lopinyon lé z’ote Mi prévoi déza in lopozission, in bataye ranzé, rante bande tèz, é bande kontrotèz sirtou pou sèye konète koman lo monde zordi lété déviré : la kriz sanitère konm révélatère d’in monde an disloké.

Mi doute pa non pli nora in lafrontman sèryé dsi la fasson bande péi é bande pèp rish épi zot sistème kapitalist téi fé pou édé, sansa pa édé, bande péi épi bande pèp an défavère dann lo siklone kovid lé zané 2020. Mi doute pa ké sak bande zom di fitir-sansa bande bizar kréatir – va trouvé, sar bien intéréssan pou konète lo monde konm li lé zordi. Mi domande amwin konm ébzanpe, kossa bande zéspèr dan l’avnir va panssé dsi lo plan Covax konm ède pou la vaksinassion d’moune, dsi la réaksyon bande péi l’érope épi l’amérik dann lo shoi déssèrtin vakssin é lo bordaz d’ote kalité.

Figuir azot, mi sorte lire dann in dépèsh zoinal kékshoz intéréssan dsi lo vaksin Covershield l’OMS la déside distribyé dann in karantène péi dsi la tère. Mwin la mèm antande lo gouvèrnman Madégaskar apré protèste pars vaksin-la, in sorte astra zaneka fabriké dann l’Inde i rouvère pa gran lo bande porte l’érop touristik – pli zénéralman pars zot i préssan néna vaksin pou pov épi vaksin pou rish. Vaksin k’i raporte pa bande profi kapitalisté pi sète i rapotrre dé mil é dé san… In vré wati-watia, in sobatkoz san fin, pou bande kréatir di fitir pou zote sèye dékodé épi konprande kansréti in pti pé lo monde par plass an disloké nou la pou viv dodan koméla.



Inn modékri, inn ti lavi, inn komantèr ?

signaler contenu


Facebook Twitter Linkedin Google plus