Mi souvien kan mwin téi sava lékol primèr, té pa rar dan la kour bann marmaye téi zoué la krosh mé pa landroi l’avé galé, sansa latèr dir. Pou bien zoué la krosh téi falé in landroi zèrb té in pé épé, konmsa i amorti la shute.

Mé antansion la krosh l’avé son règloman é si wi réspèk pa ou lé diskalifyé. Par égzanp, kan ou la tonm dsi out ladvèrsèr dann in karo gro shiendan, na pwin lo droi tienbo zèrb pars si wi tienbo zèrb, mèm an pontan out ladvèrsèr néna difikilté pou kapote aou.

Pou termine in konba téi fo inn i kriye tir, sansa bann spéktatèr i apèrsoi lo dé litèr lé pa égal fors. Alor téi arète lo konba.

Néna kék zané demoune la vouli rodone la krosh son favèr épi roganiz in fédérassion mé mi koné pa si sé in éspor la ropran favèr pou vréman. Antouléka mi panss té inn bone shoz rodone ali in dézyèm souf.

Alé ! Mi kite azot rofléshir la dsi, é ni retrouv pli dvan, sipétadyé.

Justin