Bann zapartman la transform an four pou konsèrv la shalèr, pars la obliye la vantilassion pars bann zinjényèr la obliye arienk sa dann zot kalkil savan.

Astèr bann péi l’érop i pran l’espagn konm modèl. Grann sirfass, zimnaz, la Gare, épi tout landroi néna in gran batiman avèk in gran léspass, la transform an landroi vantilé pou la plipar, klimatizé pou déssèrkin é la..kom lé fassil shanjé dress kabaré bann lokal pou lo fré é pa tro lwin la kaz demoune… Pa pliss sink minite, sansa dis minite a pyé.

Mi panss bann dirizan léspagn i doizète kontan pars zot la trouv sa an promyé é sirman kan tout l’érop nora suiv azot bann moune frazil va gingn in bon protékssion.

Mé la pa toussa é la késtyonn fon alor ? Si zot i rapèl la késtyonn fon lété lité tèl fasson la moiyene tanpératir i dépass pa in dogré édmi mé konm zot i oi lé fassil shanj lobzéktif. Lé fassil ranplass lobzéktif bann zakor d’
Paris par in bann sal klimatizé sansa vantilé… Chouette ! Konmsa lé possib kontinyé polyé, kontinyé akimil lo CO 2 épi kontinyé travaye avèk charbon, gazoil épi toutt bann sours lénèrzi poluante.

Alor toudinkou, sanm pou mwin la fine obliye bann zobzéktif bann zakor d’Paris épi ranz dann lo roiyome linpossib lo in dogré édmi.

A bon antandèr salu !

Justin