Alon mazine in kou Justin i di in nafèr konm sa : nou, krétien, ni kroi shakinn nana dann son kèr in bondié, épi so bondié-la i donn ali bann bon prinsip pou aminn son vi, épi pou aminn la sosiété... Kossa zot i diré ? Mi pans zot i diré : “Justin i parl bann shoz li koné pa ! La lang la poin lo zo !”.

Éstèr, alon mazine Justin sé pa Justin ! (zot i vé in laspirine avan mi komans mon kozman ? Non ! Bon, apré, vien pa s’plinn !). Justin, sé in prézidan dann in péi oussa napoin in rolizion d’Éta, oussa ou na l’droi amènn out rolizion konm ou konpran soman sa sé, konm k’i diré in n’afèr privé. Alor, mèm si ou lé prézidan, ou sar pa di out bann prinsip la rolizion konmsi sé sète toulmoun. Akoz la rolizion-la, in pé nana, in pé napoin. Tout demoun napoin lo mèm rolizion. Soman, tout demoun nana lo mèm prézidan, alor kan i di in n’afèr lé kontrèr pou in pé, lé riskab z’ot kardiak i lèv.

Mésié lo prézidan, La Frans-la, sa lé laïk sa. La pa bon manièr wi fé, akoz ou sar fé batay bann fransé inn avèk l’ot. Wi koné, bann zélikibrasion-la, lèss sa pou Antoine, sansa pou Justin. Alé, n’artrouvé !

Justin