Matant Zélida la ékrir Justin :

Mon shèr nové, mon spès salté, rouj de fon dovan l’étèrnité, mi sava dira ou in n’afèr, mi koné i sava paf é plézir aou. Pou koasa, Pars i port dsi bann lang demoun i parl, i lir épi i aprann. Nou nana innn shans sé ké l’istoir la donn anou, près san domandé, la lang bann fransé. Donk, in lang nou la pa invanté, é in lang i pass in pé partou alors, plito ké ronz nout frin dsi lo kréol, alon port tout nout l’atansyon dsi lo fransé : bien koz ali, bien lir ali, ansèrv ali pou bien sizaye nout manyèr pansé. In lang modèrn, bien adapté par raport la konésans modèrn, ala sak i fo anou. Nout patoi lé sinpatik, mé la pa la sinpati i amenn lo mond, la puisans é nou lé pli sir d’an avoir la pouisans avèk lo fransé ké avèk nout kozé kréol. Tok ! Pran sa pou toi !

Justin la fé pou répons :

Matant, la pa la lang i done la puisans, sé l’armé k’i done in n’afèr konmsa é anplis ké sa i fo galman la puisans ékonomik. Agard lo lang amérikin ! La pa lo lang par li mèm i donn la puisans mé la puisans do fé l’armé l’amérik, épi son puisanns dofé i baz dsi son puisans l’ékonomi. Arzout avèk sa son l’inflians lé bazé dsi son moné-lo dollar - i domine lo mond dopi tan étan d’zané. Ni pé mèm azout ék sa son puisanns dan la syans é konm di lo kont la boukl lé bouklé.

Matant na oin in lang infèryèr épi in lang sipèryèr. Néna mèm désèrtènn lang si tèlman bien tayé, si tèlman bien kalkilé pou manyé bann konsèp syantifik épi filozofik, mé z’ot puisanns militèr, ékonomik, suivan z’ot rolasion intèrnasyonal la dékliné é avèk sa z’ot prop lang la pèrsd son réyoneman, la pi ansèrv tranplin pou domine lo mond.

Astèr matant, ou va dir amoin, si in péi, avèk in pèp, la poin la puisans ékonomik ébin son lang la poin la shans rézisté. Astèr sa la pa vré : bann gran péi, gran konm zot i vé na pi lo moiyin pou domine lo mond san pour san. Konm zot na pi lo moiyin, zot i pé pa atak partou l’indépandans bann ti nasyon, bann pèp pa tro nonbré é banna nana zordi lo moiyin pou défann z’ot l’indépandans épi z’ot préstiz. Agard Vietnam, agard l’indonésie, agard désèrtin péi l’amérik di sid, agard Kiba... Arzout èk sa lé posib zoué dsi lo bann divizyon rant bann gran nasyon épi rézisté.

Tok ! Pran sa pou ou matant !