In zour mwin la ékri, mwin lé sir kékpar dann in sèrviss ofisyèl sogré do préféranss néna in bande tète d’zèf a l’orde zot gouvèrnman - sansa sète zot sosyété kolonyal – apré mate in plan pou élimine noute kréol firamézir, antouléka fatig ali si tan tèlman k’i lèss ali konm solission ké la disparission… Mézami konplo konmsa la fine fé dann passé é mi rapèl bien déssèrtin zafèr :

– In linspéktèr primère téi di : « mon granpèr téi koze provanssal é li téi ékri dann lang-la, mon papa téi konpran ankor mé téi koze pi lang-la, mwin mi koze pi provenssal é mi konpran pi. Lo kréol va pass parèyeé mon rol konm inspéktère sé d’amenn ali dann shomin la. »

– Mi souvien in zour mi sava fé in prize do san, é l’avé in doktère an syanss la koze avèk mwin. Li la dmande amwin si mwin néna in frère i défande lo kréol. Fyèrman mwin la di oui. Li la arvir amwin si mon frère i panss pa li sava dann sanss kontrèr lintéré bande rényoné…

– Mi panss mwin la fine ralkonte azot lo tan inn-dé saz fam téi di bande madame an voi d’famiy i fo koze avèk zot bébé dann zot vante, mé i fo i koze an franssé pars sansa zot va fé ali d’tor pli tar…

- Mi rapèl ankor in sirkilère méssyé Gioux, in réktèr, l’avé fé pou anpèsh koze kréol dann lékol, kissoi dan la klass, kissoi dann lékol. Mi souvienkan lo prézidankomité d’la kiltir, Robert Gauvin l’avé adrèss in diskour lo minist l’outre-mèr, dann tan pou ire ali si lo tan « défandi koze kréol épi krash atèr »lété do rotour.

Zot va dir amwin sa lé fini é sa lé déyèr nou pars demoune zordi néna léspri rouvèr. Pétète mé mwoin lé pa sir ? La prève néna poin lontan la fé in vote l’assanblé nassyonal pou in loi pou favorize bande lang minoriotèr é dë gran parti la vote kont : la droite répiblikène épi La franss insoumize. Aprésa, konsèye konstitisyonèl la kass lo loi si mi tronpe pa.

Issi mèm La Rényon, dann noute pèp, la réakssyon lé pankor étinde é mèm si banna lé afébli, si konm k’i diré zot lé KO doboute, na poin d’rézon zot i sèye pa rovnir an fors : azot avèk in sèrtènn form zakobin san kilote laba dann La Franss.

kissa i anparl ankor la kabal konte in fondkèr in poète rényoné pou anpèsh afish sonpoème dann park nassyonal lé o… Mi panss pa nou na l’droi dor dsi n oute dé zorèye an obliyan la lite : la lite i pèye OK, mé si wi amenn ali ! Si wi amenn pa, fouti pou ou !

La pankor fini.