Méssyé, Médam, La sosyété koz èk mwin sé koz avèk in kouyon, mé sé o pyé d’lo mir k’i oi lo masson. Mézami, mi pans zot i koné kozman-la é kossa li vé dir kan ou lé anparmi. La lang konm zot i koné i ansèrv in bonpé zafèr, mé demoun kan i panss la lang i majine lo kozman. Kan i di demoun i bate la lang sa i vé dir demoun apré koz san fin. Kan i anparl bann mové lang, sé sak i di dé shoz i fo pa dir :Afatia i shant pa »mové lang la di la fé ». Si i di galman la lang na poin lo zo, sa i vé dir napoin arien pou anpèsh ali kozé. Mwin la mèm lir in provèrb i di déssèrtin moun néna la lang avan lo sèrvo. ;donk i koz san rofléshir é néna in bonpé d’moun lé konmsa. Mézami provèrb-la i lanss anou in apèl a la pridans, li di aou kozé sa i fo, mé pa tro, pa san rofléshir. La dsi nou kite anou é ni artrouv pli d’van. Sipétadyé.