Tansion sa in kozman i doi fé travay nout léspri. Akoz ? Pars lé vré na poin lo zo dan la lang konm dann lo foi, lo poumon épi d’ot bout ankor. In pé i apèl sa la shèr jenn !

Touléka an vré si na poin lo zo, li lé élastik, li gingn tourn-viré… Sirtou li pé di n’inport de koi. Alor, ou i pé gingn l’an-nuiman avèk sa. I di pa : « Di dé mo sé pèrd in z’ami ! » si ou la di dé shoz k’i fo pa… Mé kan la lang lé bloké, kan lé défandi kozé, lé pli pir ankor.

Dizon ou i pèrd in liberté fondamantal, i apèl libèrté l’éksprésyon. In rosh i pèz dsi out lang é na poin pli maléré é pli initil ké ou. Mi arèt la, mé mi domann koman zot i oi sa. Fé travay zot koko ! Fé bouy zot matyèr griz é mi pans rant-rant ni pé tonm dakor rantre nou. Fé roulé férèr !