Kossa i ansèrv la lang in pèp ? I ansèrv in kantité zafèr, sa lé sir ! Alors si i di, avèk la lang i kominik. Sa lé vré ! Mé kèl kalité kominikasion ? Tout kalité ? Mi oi in pé i grat zot koko akoz zot na doutans. Zot i pans : fransé-la, langlé-la, shinoi-la... Sa bann zoutiy sipèr : toulmoun i gingn diskite dsi toute zafèr, toultan, ninport ousa. Oté, kabass !
Solman lang kréol La Rénion ? Moin lé apépré sir, déssèrtin moun i di, akoz zot i pans pou vréman : "I sava pa bien loin avèk so patoi sinpatik !". Dizon, i gingn fé ri, rakont zistoir, mèm dir : "Mi èm aou konm koshon i èm la bou !". Pa plis ! Pa plis ?
Mon pti pé d’san i bouy, akoz mi pans, tout lang, si i fé léfor ki fo, si i dévlop ali, li na moiyin goumante son kapasité gingn toutsort shoz : sak lé sinp, épi sak lé konpliké.
Moin nana souvnans in liv moin la lir* oussa i grènn in pé tout sak i pé di an kréol : nana zafèr oui ! Kan mi pans sa, mi trouv la pa pou étone amoin : akoz la lang, sa la pa lo promié signal gou d’sèl in pèp ? "La première marque du génie d’un peuple". Sré t’i pa la vérité, sa ?

* Axel Gauvin : "Du créole opprimé au créole libéré".

Justin