Oté ! Lang kréol momon, papa ! Lang kréol demoun zordï épi demoun lontan, ti-kolon épï gro vaza ! Ou minm lo bob, lo kayanm, lo bat-avèk, lo tanbour, lo flït sis trou, triang, siflètt, kordéon-a boush, signal dan la konk.

Aou mem i di mon zézèr : « Mi em aou ! », i rakont par la boush mon vyé gran-mèr koman nou lavé pèr siklone, i ésplik bann zanfan koman i tourn in bon rougay sosiss, i parl la vi, i parl la mor, i joué darion, i kriy apré lo shien, i di granmèr kal, kélèr i lé ? Ou mem i shant dodo-la-minette, séga, romanss, maloya, kabare. Ou mem i tourn fonnkèr, l’amour, la vi, la mor, la lït. Ou mem i rakont zistoir Ti-jan, grandyab, doub-kott, doub-kèr.
Aou mem la boir lo san avèk Sitarane, la sov avèk bann maron, la tyé dmoun avèk bann shassèr maron. Ou mem i domann kossa in shoz, i di provèrb. Plï modèrn, i zoué dann pièss téat, ou fé roman, nouvèl, ou mem i tourn dann film.

Ou la pa solman in zoutiy pou komïniké. Ou sé lo plï gran bout la kïltïr épi son soubassman ,ou sé lam in pèp : lo pèp kréol la rénion.