Promié minis la Frans la done dépité Lebreton in mision. Mi dout li va fé mirak, mé alon atann, nou va bien oir. Mé shak foi mi antan ali, kisoi dann in radio, kisoi dann télé, moin na konm in dout dsi son kapasité.

Pou komansé, li shoizi la tèt pou diskité. Kan l’AJFER la domann ali in randé-vou, li la di dann télé, li na poinn kont pou rann in bann moun lé né avèk in kuiyèr l’arzan dan la boush. Kosa k’so fraz-la i vien fé dan la konvèrsasion ? Mi pans li tousèl i koné. A moins ké li vé dir, in jèn, si son famiy nana lo moiyin, i fo pa li rod lo pou dan la tèt in dépité sarzé d’mision... mé mi oi pa lo rapor rant lo pozision sosial in moun épi son rovandikasion pou an avoir in travay dan son péi.

Na poin lontan so foi isi, ala li rod dézord avèk in sou-préfé rénioné, pars lo boug la fé la démonstrasion, bann Rénioné lété, plis ké bann z’Antiyé ankor, viktime l’inzistis pou trouv in travay sir plas dan la fonksion piblik. I diré mésié Lebreton i domann ali par kèl droi lo sou-préfé rénioné i done son poinn vizé dsi l’anploi bann Rénioné. Ala k’li di, lo boug, sé Sarkozy la rokrit ali, donk li lé diskalifié pou koz dsi l’anploi bann Rénioné. In n’afèr konm sa i fé tonm amoin an arièr, pars mi pans pa in shif épi in réalité, li lé d’gosh ou bien li lé d’droit, li lé di koté d’Hollande ou sinonsa di koté Sarkozy. Drol fasonn oir lé shoz !

Yèr soir, moin la antann mésié Lebreton apré done son définision kisa lé Rénioné. Pou li, in boug i domann èt mité La Rénion in an avan l’az la rotrèt, sé pa in Rénioné, sé in shasèr prime. Dakor, épizapré ? In Rénioné nana son baz isi La Rénion. Dakor, épizapré ? I fo li vé travay pou dévlopman La Rénion. Bravo ! Mé si ou i vé gingn out soso sinploman, amèn out vi lo mié posib dann out péi d’nésans. Mé si out nonbri lé antéré isi, donk ou lé pa Rénioné, é bar aou, na poin travay pou ou ! Mi pans i sava loin in rézonman konm sa. La lé bèl la ! 

NB : Konm mon vié famiy i di, rézoné konm sa, sé rézone konm tanbour.

Justin