Matante Zélida la ékrir Justin :
Mon shèr nové, mon spès salté,
Alor koméla la Rénion sé pi in péi fransé ? Alor lékol, marmay i pé abiy konm zot i vé ? Mète voil konm dann péi zarab !..Akoz mi di aou sa ? Bin pars mi oi bien kosa zot i ékrir, kosa bann zéli rouz fonsé i di... Kosa zot i vé ? Zot i vé La Rénion i vien in péi zarab. Aou, mon nové:kosa ou rod ? Ou rod lo tit mamamouchi ? Sort-la don !

Justin la réponn aèl

Out kalité-la, biensir nar pa été ou pou pran la défans bann jènn fiy... Mé, sérièzman : si in malbarèz i rant dann lékol pié touni épi lo poin déssi son fron.. mète ali déor ? Si in pti fiy zarab i rant èk in bandana, in pantalon déssou son jip... donn ali diréksion la sorti !? Si inn i mète in méday pandiyé èk son kou..porsui ali ? Si in n’ot i fé son karèm lèr la kantine, pandan dé-troi somène,kossa i fé sanm li ? Sak i manz pa bèf, sak i manz pa kabri, sak i manz arienk léguime,sak i vien pa lékol samdi...di azot bar azot ?... Matant, la lé grav la !

Justin