Ziska zordi, demoun sak na poin travay té i kont dsi la komine pou gingn inn-dé pti kontra. La plipar d’tan, zot té i baz dsi la komine pou dépane azot in pé tanz-an-tan. Astèr, demoun i komans konprann pliz-an-plis sé l’Éta ki okip problèm l’anploi, la pa lo mèr. L’Éta i mèt a dispozision bann komine plizièr milié kontra shak ané, moin-zan-moins dopi in sèrtin tan. Solman, la Kour réjional bann kont, kan li étidié la sitiasion bann komine, li romark bann komine nana plis travayèr k’i an fo. Défoi plizièr santèn travayèr an plis. Dé foi mèm i koné pa ousa so bann travayèr i lé vi ké zot i figuir mèm pa dsi lo l’organigram. 

Lo minis bann péi l’Outremèr, in moun i mank pa d’zidé, konm di lo kont, in boug k’i rès pa a kour dovan la baskour, la trouv la solision. Li la di, i fo baz dsi l’anploi dann komèrs, dan l’artizana, dan l’agrikiltir. Li na bien rézon, sof ké dann komèrs, dan l’artizana épi dan l’agrikiltir, l’anploi, sa lé rar konm korn lapin, é nana plis san-soisant mil pèrsone inskri dann Pol-anploi épi zot i vien kogn dsi la port. L’èr-la, kozmann minis, sé kozman pou done manjé la boush… konm di nout bann kouzin morisien, sé kozé pou pa la boush pi.

Mèrkrédi, in bann shomèr la prézant dovan shantié Véolia dan la komine Sint-Mari. L’apré fé lo stasion "Gran Prado" pou rosikl le lo sal... Demoun té i vien pou rod inn-dé plas travay pou bann shomèr, zot l’androi, mé la pa vouli done azot gran-shoz. In shomèr la di konm sa, i fé gran-gran shantié konm sa dan zot komine é zot i gingn pa arien, sa sé in n’afèr k’i marsh ar pa. Zandarm l’arivé, bana la parti, é bien antandi, pèrsone i fé pa in ka ansanm. Ziska kan sa ? Zot i konpran sak mi vé dir azot an mo kouvèr ? Zot i pé maziné sak i pé éspasé si bann shomèr i prézant partou dovan bann l’antropriz, dan bann komèrs, dan bann biro ? Zot i oi a popré kosa lé riskab arivé ? Amoins i mèt la polis partou, é si i mèt la polis partou… la lé riskab pété pou vréman. Ki vivra véra !

Justin