Koméla néna bann vré liv dann la lang kréol rényoné kissoi bann tradikssion bann liv plito klassik. Néna galman déssèrtin bann déssiné é sa sé dé shoz mi yèm. Pou inn bone rézon, pars la lang kréol sa sé nou k’la fé, sé lo pèp ké la fé é fransh vérité oute prop zanfan sé sak wi done toute kalité, é ou néna touzour inn doz l’amour pou done ali.

Astèr si zot i poz amwin in késtyon dsi bann léktir bilang m’a réponn azot , fransh vérité, mi yèm sa tro. Ziss dovan mon tète, kan mi lir, sansa kan mi ékrir,néna plizyèr liv an kréol épi an franssé… Néna toute liv mwin la lir avèk mon pti zanfan dan lo dé lékritir, lo dé lang ni pratik ansanm : le petit Prince é lo Pti prinss, Faim d’enfance épi Bayalina, l’étranger épi létrandéor, nout péi dann lé dé lang épi d’ote é d’ote ankor

Mi di pa zot toute lo nom bann zékrivèr mé néna Daniel Honoré, Axel, Robert, Gilles Gauvin, Céline Huet, Jean-Louis Robert, Christian Fontaine, Alain Armand, Kristian é son zistoir, Carpanin Marimoutou, Davy Sicard épi d’ote ankor –mi sava pa dir toute pars mwin la bien pèr tro obliyé. Kossa toute la bann i ékri ? Déssèrtin i fé bann roman, sénario pou bann déssiné,d’ote i fé bann fonnkèr, d’ote i ékri paroli pou bann shantèr avèk zoli mizik épi zoli parol é toussala i anshante amwin.

I paré La Rényon sé lil bann poète,ébin pa solman sa, la litératir rényonèz lé vivan, lé gayar, lé nonbrèz. Si mwin té kapab pran lo tan mi panss mwin noré lir toute la litératir mon péi dopi lo tan bann zanssien an passan par lo tan d’zordi é sirman ossi lo tan d’domin. Avèk in tan kant mèm pou mwin done azot nouvèl Justin.

Mézami si mi di azot mi shoizi o feeling konm di bann zanglé, mi di azot sa san onte, mi di azot sa an jouissan- mon papa Félix téi yèm mo la !- é mi panss la jouissanss sé kant mèm kékshoz de bon. Zot i panss pa ? A bon antandèr salu !