Zot i koné koman tout bann polis i fé pou fé tonm in moun zot i pans li lé koupab. In bon zoutiy, sé la vi privé, sèt lo moun mèm sansa sèt in dalon i fé biznès èk li. Tout moiyin lé bon ! Touléka, dann bann fime épi bann liv, polisyé i di dé shoz konm sa. Mi ansouvien in zistoir l’avé dan la bann in ga l’avé dé vi, inn lo zour èk son famiy, inn la nuit avèk d’ot kalité d’moun, é mi souvien sak in moun mi koné bien té i di ; li té di konm sa : méfyé aou pars la polis i koné dsi ou plis dé shoz ké ou mèm. In kozman konm sa i inkyèt aou, pars kisa la poin dan son vi konm in rokoin kashé ?

Zordi la polis la pi bézoin déplasé. Dan son biro, li suiv aou, ou sinonsa demoun ou i koné. I di aou konm sa : rakont sak ou l’apré fé ! In pé i di zot l’apré manz kari volay, d’ot i di zot l’apré rogard match foutbal, mé na d’pot i di sak zot l’apré fé mèm si lé in pé limit... L’èr-la, sa i sava dan out dosyé. Bann fèy i anpil ziska lo zour, pétète, i nyabou may aou dan kékshoz par sak la sort dan out klavyé sansa sète in n’ot, in zami ki vou vé di bien.

La NSA, zot i koné kosa i lé ? Sèrvis ransègnman amérikin ! Zot i suiv intèrnèt, Facebook, Google, Twiter é tout lo tranbleman. Si ou la lès shap in n’afèr, i shap pa zot, pars zot lé profésyonèl la-dan. Zot i koné nana in gran zafèr léspyonaz demoun l’apré dékouvèr. I diré, d’apré sak moin la konpri, l’Amérik i éspyone in total kapital : bann zamérikin, bann zéropéin, bann gouvèrnman, parlman éropéin. Tout, mi di aou ! Tout ! Koz pa dann téléfone, i akout aou ! Tweet pa, i lir aou ! Roganiz pa rényon, i koné sak ou i di ! Alé dan la natir, mé tansyon, inn an parmi la rouv son tablète sansa son téléfone.

Bin, la libèrté d’moun alor ? Na arienk sak Big Brozèr i kont !

NB : Zot i koné, mi sipoz, listoir in ga i apèl Snowden ? Sa in for zépine dann pyé lonklé Sam.

 Justin