Nout listoir lé kourt : mèm pa 350 zané, mé pou fé in nafèr i fo d’tan ! Lésklavaz la aboli an dé kou : inn lané 1794, la manké. Inn lané 1848, la gingné solman demoun té kaziman dann lésklavz dann sistèm zangazé. Lané 1946, la aboli la koloni mé kolonialism la dir ankor in bon bout tan épi légalité sosial la vni arienk dann tan Mitterrand.

Dopi in koup de tan avèk la rézionalizasion, nou la anbèk dann shomin dévlopman dirab. Nana inn-dé bon plan, bien maté, mé la pa an in zour va niabou fé in nafèr konmsa akoz i fo dévlop an vré lékonomi, la sosiété épi armète droite lanvironeman. Dann tousa, la pa akoz ou la fine gingn in nafèr, ou la gingn ali inn foi pou inn bone foi : la libèrté lé toultan ménassé ; l’égalité i fo vanz pou sa ; lanvironeman, nana dmoun i fatig ali : Dévlopman dirab, nana in bann sagoin lé kont sa.

Donkalors, i fo la mazorité dmoun i vanz, i rant dann train la libèrté, légalité la protéksion la natir, épi lo dévlopman dirab. Sa lé obligatoir sinon nout kanar lé noir. Fransh vérité, nou la bozoin la liberté, l’égalité, épi lo dévlopman dirab. Sa mèm, i fo pou nou. Fransh vérité !

Justin