Matante Zélida la ékrir Justin :
Mon shèr nové, mon spès salté,
Moin té sir zot téi sar di sa. Pou zot, bann rouj de fon, in n’afèr gouvèrnman i fé sé in mové z’afèr. Ala, zot i krétik panié la ménazèr, méssié Jégo la donn l’ord son bann sèrvis pou fé. Ala k’zot i di, lo zafèr lé pa lizab ! Pa lizab ? A bon, kissa la anvoy azot lékol dovan la port ? Téi falé rant anndan, konm sa zot noré aprann lir épi zot noré pa pass z’ot tan pou an-nuir dmoun !

Justin la fé aèl pou répons :
Mon vié matant, moin lé kontan aprann la list méssié Jégo, pou ou, sa lé bien lizab. Konm d’abitid, kan ou i ékri in n’afèr, ou i agrandi karo kann la kouyonis. Ou la agard bann pri dann zournal, ou la trouv in solision itil la-dan... in manièr alé fé out bazar é pèy pli bon marshé ? Mi pans pa... Épi, mark lo pri sé fé bès lo pri ? Sa moin lé pa sir.
A moins ké sé pou boush lo zié kréol... Donkalor, in fizi pou tir dann koin, in sort fizi kaï-loush, i aviz in diréksion épi lo kou i sava in n’ot koté.

Justin