Matante Zélida la ékrir Justin
Mon shèr nové, mon spèss salté, rouj-de-fon dopi létèrnité, zot lé konmsa zot alor ! zot osi, zot i fé l’alyans avèk sak in tan zot téi apèl bann kont-parti. Zot osi zot i partisip lo manjé koshon konm tout lé zot. Di pa moin sa la pa in kours pou ramass inn-dé post zélu par si par la. Tout lé bon pou sa é sirtou di pa zot-si ou i vé pa gingn inndé kozman-parti kominis sé in parti konm in n’ot. An atandan, mi kroi sak mi oi. Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr out kozman la pa fé pou étone amoin. Matant ou i pé kroir sak ou i oi, mé ankor i fo ou néna lé kod k’i fo pou konprann la réalité. Ma done aou in sèl légzanp : la povrété. é ou va oir si nout bann kamarad i partisip lo manjé koshon sé lé gzanp la povreté, in késtyon i mérite in bo n travaye kominis.
La povreté matant sé kan in paké d’moun na poin larzan pou manz normalman. Ni pé dir sé osi kan bann marmaye lékol lé dann movèz kondisyon pou bien travaye. Sé kan lo moun malade lé pa bien soigné, kan zot lé viktime lalkol, kan zot léspérans de vi lé rakoursi par aport sak i viv normal… Alor Matant vanj kont la povrété sé kékshoz lé bon pou nou rényoné é lokazyon in bon travaye kominis é in bon rézon pou ète alyansé. Tok ! Pran sa pou ou !