Mézami sé zour issi mwin mwin la antande in bonpé kozman défétiste : kozman demoune i di lé nitil réklame sossi, réklame séla pars la pa pou gagné. La plipar d’tan sak zot i nyabou fère sé dékouraze sak i prétan pa larg lo kor épi kontinyé la lite.

Konbien d’moune i di la lite bande shagossien i sèrv arien pars lé shanss zot néna pou gingn rotourn shé zot lé fèb, kaziman inégzisytan. Zot i azoute mèm kan banna i ranporte in viktoire sé kaziman in kou d’zépé dann lo. Poitan lo groupe réfijyé shagoss avèk olivier Bancoult i kontinyé la lite. Pèrte de tan ? Nou va oir pli d’van.

Astère alon anparl in pé l’Afrik di Sid kan Nelson Mandela té an prizon. Konbien koko fromaze té i di dann radyo, dann télé, l’ANC (congrès national africain) l’avé poin okin shass bate lapartéid atèr. Kan zot téi marke toute bande zargiman konte la viktoire zot l’avé dé paz é dé paz, é kan zot té i align lo bande shanss viktoir l’ANC l’avé trépé d’lign. Aprésa zordi, la pa bate atèr l’aparteid é li la pwin okin shanss rotourné.

Ni pouré mark in bonpé ka néna in lite lo pèp l’apré améné, é pou linstan la pankor ranporte la viktoire. Mé kissa i di nora poin la viktoire an boudikonte ? Si la lite néna zobzéktif réalist, si li lé améné konm k’i fo, si néna bon-bon taktik é bon-bon téknik avèk in bon stratézi… Lalite i pèye sa mézami é néna arienk la lite k’i pé péyé...

Sak i vé larg lo kor li larg, mé lé sir sète-la la pa pou gagné. Sak i larg pa i larg pa pa é sète-la i pé gagné é va gingn in zour kan pèrsone i atandra pa.