Mi oi tout suit inn dé gro léspri pou dir : rant bann klass, i soubate pa ! Kan ou lé an sizièm in, ou zoué balon kont la sizièm dé. Inn i gingn, l’ot i pèrd, mé si nana bonbon, zi d’frui, tout i manz ansanm, i boir ansanm. Lé normal, mé sa in n’afèr marmay.

Kan bann marmay i grandi, in pé i vien travayèr, in pé i vien patron, in pé shomèr, néna i fé karyèr dan larmé, sansa la polis, étsétéra-la ké lo ra... Ala inn-dé souvnir marmay i arvien dann zot tète, épi zot i di : Baya ! sa la pa sérié sa so zistoir lit dé klass. La prèv, droit sanm gosh, patron konm sindika i boir lo kou ansanm.
Sof ké, an misoukant ,ou aprann bann patron la métalirzi té i mète larzan dann in kèss noir, konmsa si nana in grèv par-la, i donn lo patron in bon moné, o moin li négosié pa. Épi lo travayèr ki kroi li va mète lo patron aznou, li pèrd son tan. Akoz plis lo patron i pèrd larzan in koté, plis sindika paton i gonf son posh.
Alor, kissa la di : "la lit dé klass la pi" ? Sète-la sé in sharzèr d’lo pour sur, sansa li zoué son rol, boush lo zié dmoun. Karl Marx, lèv aou oté !

Justin