Si mi anparl de sa sé pars zot i koné bien bann zétidan sé bann jenn épi bann jenn-la va rotourn dann zot péi pou okipe bann post inportan kissoi dann lékonomi, kissoi dann la kiltir, kissoi dann la politik, sansa d’ote séktèr inportan-avèk lo bon souvnir zot nora amass dann tan zot zénèss dan La Franss.

Mézami la zénèss, sa sé in pèryode éssanssyèl dann la vi l’ moune. La zénèss passé an Fanss-la va akonpagn bann moune-la dann toute zot vi ; in gouvèrnman bien inspiré nora fé in sézour d’rèv pou bann zétidyan é lé pa ditou sak gouvèrnman téi vé fé… an kontrèr :

Téi vé fé pèye banna konm in kossion pou vni fé zot zétide, évite done azot lo soin gratuite, évite donn azot bann zavantaz sossyo. Dizon té i vé fé in séraz de viss tèl fasson k’i dékouraz azot alé fé zot zétide dann La Franss. Assé pou fé oir azot La Franss sou in mové zour é akiz aèl pars la gate zot zénèss. Mé gouvèrnman i kass pa la tète pou sa vi k’li angazé dann in zé d’pongn avèk lo fron nassyonal Marine Lepen.

Biensir, la pa sak bann radio épi bann télé ofissyèl va di piské zot lé solman okipé donn in bon limaz gouvèrnman Macron. Mé kan wi krash anlèr, sa i rotonb dsi oute boute lo né é zot va oir sé sak’varivé.

A bon antandèr, salu !

Justin