In légzanp bande rotrète i sava goumante 4 % alé oir l’inflassion va dépass karéman lo 4 %, konm toute demoune épi lo gouvèrnman li mèm i koné. In n’ote afèr i apèl la dékonzigalizassion l’AAH : sa i vé dir i tyinbo ar pa kont lo rovnu l’ote konjoin pou kalkul l’AAH. In n’afèr bande handikapé i domand dopi lontan… Mi rapèl sa lété promi par Jacques Chirac kan li la fé don dézyèm manda é anplis sa sé in n’afèr demoune i oira la koulèr avan 2023. Zot sar rish an promèss, pa anréalité…

Astèr zot va di amwin loi-la sa in loi pou réponde la konjonktur é pa pou trouv in solission de fon pou bande problèm de fon. Mi andiskonvien pa, mé si l’avé tienbo konte bande propozission d’fon — an partikilyé sak noute parti la propoze dopi dé z’ané é dé z’ané, pétète ké noute péi zordi n’arté dévlopé épi li noré pa bézoin d’in loi d’sirkonstans.

Mi domand amwin mèm si gouvèrnman la pa apré prépar èk sa in nouvo zélékssyon. An touléka mi trouv li l’apré boush lo zyé demoune la Franss épi demoune l’Outre-mer pars nou la konète d’ote loi la pa shanj an myé la vi d’moune.

Pou parl franshman, toute bande loi konmsa sé dé pansman dsu in zanb de boi é pa bokou pliss ké sa — a bon ékoutèr, salu.