Dopi yèr, bann dépité i débat si in prozé d’lwa lasanblé nasional é an dé sominm i kont débat. Sirtou i prétan lo gouvérman i kont la d’si pou anbrèyé, pou pran in pé favèr, pou ropran in nouvo dépar boudikont. I apèl lwa la, la lwa Macron, lo non lo boug la ékri. Souplé koué néna andan la ? Swa dizan sé in lwa pou goumant la krwasanss, pou kré plis laktivité, tousala. Solon mwin, si mi tronp pa bann syndikat i rofizré lo total èk lo kapital andan la é i invit bann travayèr pou manifésté. Dan lo prozé d’lwa néna pou bwar é pou manzé i di, néna i di minm sé in lizinn a gaz télman néna lanboutéyaz.

Bann dépité rantrozot lé pa tro dakor é i domann poukoué fé konpliké kan i pé fé sinp. Na pwin sifizaman d’tan pou parl dé tout sak néna dodan lèr la, ma pran zis in sèl lékzanp pou zordi. Dan la lwa lé prévi fé travay domoun in pé plis la nwit èk lo dimansh, an gro lo dimansh i dovyindré in zour konm tou lé zour. Néna d’moun i travay déza la nwit, lo dimansh, zour féryé. Bann polisié, bann zinfirmié, doktèr, ponpié, la ni pé konprann, mé la i sazi pa asir la sékirité d’moun i sazi pou rouvèr bann komèrss, bann magazin pou touris.

Donkalor bann dépité i travay la d’si an so moman. Bann dépité la vré gosh i vé pa antann parlé d’lwa Makron ditou, i di si i aplik konm i lé, dizon ni pé konsidéré konm in rokil pou tout travayèr, dizon sé in lwa pou dégrinn tout. Andan la néna sak lé dakor osi, in pé dépité la dwat sanm pou mwin va vot lo tèks. A mwin mi di pou rézon, kan ni rogard listwar, bann la drwat la zamé tro défann travayèr boudikont, si banna i vot tèlkèl èk Macron, sirman i dwa pa èt in sikrodorz pou nou, plito in sipozitwar.