Mon bann zami, mon bann dalon si mi antan bien bann tète prop i okip zafèr la santé isi La Rényon néna in kriz sanitèr isi shé nou, noré mèm dé kriz sanitèr pars an plis lo coronavirus, néna la dengue i soign pa nou o pti zoignon. Kèl lé pli grav ? kèl lé moin ? Kèl bilan i fé pou l’inn é pou l’ot ? Si néna transparans i fo néna transparans dé koté-pou l’inn épi pou l’ot.

Mé sanm pou moin, sa lé pa vré ditou pars si i déklansh l’alèrt rouj pou inn, pou l’ot i donn in shif in poin sé tou. Momandoné téi done konsèye dsi la deng, mé zordi néna arienk konsèye pou lo coravirus. Si tèlman ké nout pti deng rényoné lé riskab ète zalou. A ! biensir, li la pa antann fé dézord konmsa pou li. Li la pa antann lalèrt rouz pou li. Li la pa antann va mèt in pé a l’amand si i vanj pa asé.

Zot va dir Justin lé in pé pèrnisyé dann son konparézon-antansyon : konparézon la pa rézon !- mé moin pèrsonèl mi oi pa kouék i pé an avoir d’ pèrnisyé kan ou i di rant lo dé maladi in pé i fé proférans é mi domann amoin pou kosa. Mi domann amoin si la pa pars inn i done paké ziska l’érop laba é l’ot dann milyé tropikal sinploman pou l’instan. Oui, pou l’instan pars néna in zour i apèl demin.
In zour la sézon fé sho v’ariv dann l’érop é kan v’arivé ni pé domann anou si la deng èl osi i désid ar pa vanjé. A ! Zot la konsidèr amoin konm in maladi dézyèm divizyon, astèr gout amoin é an dizan sa èl osi i déklansh in l’épidémi par fote la pa okip aèl konm i fo avan.

Tout fason é dann tout lé ka, la maladi i ariv a shoval épi i ropar a pyé. Kan kréol la komans boujé dsi la késtyonn bato téi amenn demoun malad shé nou, la trouv la polis avèk matrak épi bonb lakrimozène pou fé fèrm nout také. Zordi i trouv milyar pou inn é domin ? Domin sé in n’ot zour sa ni koné. Domin solèye va lové, dakor ! Mé an atandan la nuite lé ankor long zot i pans pa ?