Médam z’é mésyé, la sosyété, koz èk moin sé koz èk in kouyon mé sé o pyé d’lo mir k’i oi lo bon mason. Mé zami, zordi konm yèr, konm nou sar domin, nou lé dan péi Sénégal pou kontinyé nout tour l’Afrik an provèrb. Sète la moin la fine anparlé, mé anparl ankor in kou la pa in péshé mortèl ! Mi rapèl, néna lontan moin la di in provèrb péi zalman téi di konmsa : « Mansonz la pate lé kourt » é sanm pou moin sète moin la mark an o la i di a popré la mèm shoz. Si in pyé d’boi i done flèr é si li done pa frui, li kont pou arien dann léspri d’moun, sirtou pou ranpli lo bouzaron. Mé kozman la i done anou in bon lésonn vi dan la siosyété. Pou manti, i fo fé in n’éfor, épizapré si sa i rotourn kont lo mantèr, dizon li la fé zéfor pou arien pou dé prune si zot i vé, sansa pou la po d’patate. Moins ké sa ankor ! Alé ! Mi kite azot rofléshi la dsi é ni artrouv pli d’van. Sipétadyé.