Mésyé, Médam, La Sosyété, koz èk moin sé koz èk in kouyon, mé sé o pyé d’lo mir i oi lo mason. Fransh vérité, si moin té i yinbou fé konprann sa d’moun mi pans l’imanité sré soulazé. Pou kosa mi di sa ? Pars souvan dé foi ou i antann demoun dir : « Mi sava done sa dé troi kozman, i fo mi toush ali koté k’i fé mal ». Dizon ou i sava di sa in moun la fé aou in zafèr dir mèm, dizon lé mérité, mé si ou i di sa out famiy, out madam, sansa out mésyé, out zanfan ébin ou néna intéré konète lo konsékans, lo mark indélébil ou i sava lèss dann léspri, dann l’am, dann la pèrsonalité demoun i prétan ou i yèm azot bien… Astèr si sé in n’afèr ou lé abityé fé, i pé dir ou lé karéman sadik pars ou i vé fé mal, é ou i ariv, é pétète san tro konprann ou i krèz dann la vi-bann moun ou i yèm bien normalman !-in trou i rofèrm ar pa zamé. Pir k’sa, out viktime-pars i fo apèl in sha in sha !- lé posib li galman li va rofé mèm shéma tout landroi li va pasé, avèk lo moun li va frékanté . Alé ! Mi kite azot rofléshi la dsi é ni artrouv pli d’van. Sipétadyé !