Mézami kozman mi sorte marké la, mi panss sa in kozman L’afrik mé mi kalkil sa lé vré dann in pé toute péi. Pou kossa ? Pars dann lo passé - mèm zordi — lo pli for la touzour fé tape lo pli fèb. Bande zésklav légalman téi gingn lo kou ! Zangazis téi doi pa fé tape zangajé, mé mi doute zot la pa fé zamé. Paran téi tape zot zanfan, é pétète zordi in pé i fé ankor mèm si la loi i défande dann La répiblik franssé.

Lo kou i fé mal biensir, mé sak i fé pli mal sé la honte wi gingn kan sa i éspass dovan lo moune. Néna in trantène zané demoune la rakonte amwin listoir in zoinalyé, frèr d’lé d’in gro blan, la gingn in kou d’pyé kékpar dovan lé zote travayèr li l’avé domande fé la grèv. Si sa lé vré, mi mézir limilyassion lo travayèr é anpliss frèr d’lé.

Sé pou sa mi panss i fo arète tape demoune - kissoi travayèr, famiye, fanm, bononm, zanfan — pars an pliss la vanzans sé in pla i manz fré. Ni artrouv pli d’van sipétadyé !

Justin