Médame, zé Méssyé, La Sosyété, koze èk mwin sé koze èk in kouyon, mé sé o pyé d’lo mir k’i oi lo bon masson. Mézami koméla, dann déssèrtin péi la loi i anpèsh tape band zanfan : in bon nouvèl si loi-la i fini par ète apliké konm k’i fo. Mé solman, mi koné pa si néna in loi pou anpèsh done kozman bann zanfan é lé domaz-anguèl in zanfan i doizète kondané konm tape in zanfan. Pou koué mi di sa ? Pars mwin la viv mon lanfanss dan tan lontan é dann tan-la lété pa défandi tape band marmaye konm an grène alzot : pli pire kan ou la gingn in lédikasyon konmsa, lé riskab wi pran modèl dossi avèk tout elo rogré, mèm lo romor, wi pé an avoir aprésa-étan pti marmaye, mèm jenn, angrène amwin té fé plère amwin-kant a lo kou mon kuir lété dir é la doulère téi pass vite-mèm mwin téi rapèl pi la doulère lo kou inndé zour apré. Mi vé pa dire mon paran té in band bouro, mé tan-la lété konmsa. Mèm koméla na d’moun i kroi sé konmsa k’i fo fère. Alor, mézami,mi souète pa lo tan lo kou i arvien, mé mi souète lo tan l’angrènman i arète. Alé ! Mi kite azot rofléshi la dsi é ni artrouv pli d’van. Sipétadyé.