A ! Lé tro shèr ! A ! i fo fèr, mé pa tout suit, na lo tan pou sa ! A ! Sa la pa in gadzèt sa plito ?…
Ala kalité kozman i pé antann déssi bann déssèrtin radyo kan i anparl la MCUR... Ala sak i antan dan la boush bann manipilatèr. Mé pa solman : galman dann kozman in pé d’moun na poin in bon linformasyon. Dizon léspri té pa la kant linformasyon la passé.

Mé lé ga, alon byin kalkilé ! Alon fé travay nout tète ! Alon rode dann fon nout kèr kisa ni lé, ousa ni sort, épi mazine nout bann vyé zansèt.
D’apré zot, la pa bon dir bann sivilizasyon, fransé li, malgash li, Lafrik li, l’Inn li, la Shine épi lé z’ot, sé in bann gran sivilizasyon ? Nou la poin rézon di sa ? Sa i doi pa rann anou fyèr, vik nout z’ansèt i sort la-ba ?
Épi tout i doi z’ète égal pou nou, na poin inn lé vayan é l’ot lé fay, inn i dig-dig nout fyèrté é l’ot li-ki ! Lé ga, pyé d’boi na rokonésans pou son rasine !

Armèt la-dsi nout kiltir épi nout lang kréol, promyé signal la valèr nout pèp rényoné. La poin do koi bate déssi nout léstoma ? La poin do koi vant pou nout fyèrté ? Alors kozman tya-tya, kozman la boush rouvèr, kozman pou pa la boush i pi, sa i vo pa aryin... Sirtou, konparé avèk in gran projé konm la MCUR...

In mézon pou vant bann sivilizasyon é pou mète anlèr nout l’inité rant Rényoné, sa lé byin bon ! Sa lé valab ! Myé k’sa mi oi pa !
Pou kosa ? Pars sa mèm i fo ni vé pou nout pèp ! Sa mèm poto mitan la kaz La Rényon ! Pars na lontan nou la pou vanj pou sa ! Sa lé dan nout kèr d’lut !

Justin