Zédi soir, moin té apré ékoute télé kan la anons in komité d’moun la déside fé in kanpagn an favèr la MCUR : moin lété kontan pars n’avé d’moun konm Firmin Viry, Danyèl Honoré, Aksèl Gauvin, Zan-Franswa Samlong épi d’ote ankor téi i oi pa byin dann télé. Mé mi koné zot lé plis sinkante pou komansé é mi éspèr toute bann moun lé dakor pou mète nout kiltir anlèr, noute l’idantité anlèr va groupé épi va fèr antann la parol nout péi, la parol nout pèp.

Moin lété kontan galman pars bann télé i profèr souvan-dé foi donn la parol bann kriyèr d’nuite, bann sak i vé pa noute kiltir i dévlop, épi noute l’inité i ranfors, é so foi issi, la donn la parol bann Rényoné kèr fran.

Solman na in n’afèr la fatig amoin in pé, sé kan lo zournalis la di : sa in komité « dé sirkonstans ». Sa i vé dir, d’apré moin, in groupman ou i fé zordi in pé pou la form, épi domin, sé in n’ot zour.
D’apré moin, mé pétète mi tronp, mi éspèr mi tronp. Pars la kitir rényonèz, l’idantité rényonèz, sa la pa in n’afèr d’« sirkonstans », nout lang kréol rényonèz non pli, noute listoir, manyèr nout pèp lé éné, la grandi, la trouv in moiyin viv toulmoun ansanm, sa in n’afèr d’fon, sa in n’afèr séryé, sa i amontr anou shomin pou nou trap demin. Sa la pa in n’afèr d’sirkonstans ! Sa la pa in n’afèr i fé zordi, épi i anvoy fèr-foute demin !

Mi souvyin in parol Monségnèr Aubry, kan l’avé ariv in sign dann légliz Kanbiston. Bann zournalis la domann ali si sé in mirak, li la réponn : « Sa la pa in mirak ! Le mirak sé le pèp rényoné ! ».
Ala in moun i ème son péi épi son pèp é mi pans pa an avoir déform son parol. Touléka, moin pèrsonèl, sé sak mi pans, dann fonn mon kèr. Pou moin, se mirak-la, i vo byin in zoli mézon, dan la komine Sin-Pol, bèrso lo pèp rényoné.

Justin