Mi rapèl ankor, mèm si nana pli lontan k’lontan, in proféssèr filozofi. Li té i apèl Henry Lapierre. Lété in proféssèr, mé lété ossi i militan, dizon té in dalon Doktèr Raymond Vèrgès. Kan inn té dipité épi mèr Sinni, l’ote lété promyé adzoin épi apré li lété ossi plizyèr foi konséyé zénéral. I pé dir li la sakrifyé son vi pou rann sèrvis demoun… Zis apré la dézyèm guèr mondyal.
Mi an souvyin, kan li té i parl in gran pèrsonaz ofisyèl, li té i di sé in vré tib dizèstif.
Tou lé zour-shak zour, mi ékoute mon bann konpatriyote, mi agard koman zot i viv é mi konstate la boustifaye i okip in bon boute z’ot vi, i okip in bon boute z’ot tan… Pa la bouftifaye solman, mé sak i apèl bann promyé bézoin, konm an avoir in toi déssi son tète, in linz pou ranplas la fèye-rézin bann éstati, in transpor pars na poin toute sak i fo sir plas, anfin koman viv zour apré zour dépi lo komansman ziska la fin z’ot vi.
Mé bann z’ansyin té i di ossi l’om sé pa solman in bouzaron, sé pa solman in tib dizèstif. Bin alor, koman konprann in n’afèr si konpliké konmsa, koman konprann l’om rényoné, pa konprann ali byin, mé kansréti in pti pé ? Alors mi di dann mon kèr, i fo mi koné son l’istoir, sak son bann z’ansète : z’ot vi, z’ot parkour, z’ot sivilizassyon... É pi koman nou la nyabou marsh dann shomin l’inité.
A la ossi pou kossa mi pans la mézon dé sivilizassyon va byin ansèrv anou, va byin ède anou pou sa !

Justin