• Pou tout sak i pran po d’shanm pou pla kouvèr !

- Mi antann azot, souvan dé foi, apré di ninport de koi, déssi la Mézon dé sivilizasyon é dé l’inité rényonèz (la MCUR) : lé tro shèr, i ansèrv de riyin, lé pli préférab mète so larzan-la dann lin n’ot prozé étsétéra-étsétéra-la ké lo ra...
Pou zot lé sinp : i sifi tir larzan lé dèstiné fé sa épi armète déssi in n’ot kont pou fé in n’ot afèr.
Poitan, zot i koné byin, so larzan-la lé pou sa é pa pou fé in n’ot shoz ! Si i fé pa sa, larzan-la sé in larzan fouti.

• Pou sak i pran pa po d’shanm pou pla kouvèr !

- La MCUR va kout katrovin, pétète san milyon. I fé in bon pé larzan, a pépré konm pou fé lo pon la rivyèr Sintétyène.
An pliské sa, so larzan-la va ansèrv pou la kultur : konète nout passé, nout prézan, la lang, épi sak i rogard nout bann zansète, sak i sort partou déssi la tèr. Si i fé pa sa koméla, pétète i fèr ar pa zamé, alor nou va pèrd lokazyon an avoir in vré zoutiy kiltirèl.
Épi, si nou lé pou lo dévlopman dirab, é si la kiltir sé in poto prinsipal dann dévlopman-la, la MCUR sé in bon zoutiy pou sa.
Mon bann dalon, zot i koné si lavé poin n’moun pou vanj pou maloya, sèrvis kabaré, noré pi tousala ! Si lavé poin n’moun té i konsidèr la lang kréol konm in n’afèr byin nésésèr, la lang nora fine tonm an katalépsi !
Alor alon mète Mézon-la anlèr, pars sa in n’afèr lé bon pou nou !

Justin