Médam zé Mésyé, la sosyété, koz èk moin sé koz èk in kouyon, mé sé o pyé d’lo mir k’i oi lo bon mason. Mézami, i ariv défoi ké désèrtin moun i pans zot pasé lé pa dign de zot. Défoi zot la ont pou dé shoz ké zot la fé, sansa dé shoz ké zot la pa fé. Alor, in pé i rofé zot pasé, i rakont azot tèl fason ké zot lété pa. Mi rapèl in moun l’avé nyabou pass lo mèr dann son komine nésans é pou amontr zot mérite la invant azot in pasé zanfan mizèr. Mé oila, i ariv ké néna d’moun la mémoir lé bonpa zot tronpé par sak bann zistoir pou dor dobout. Si tèlman ké défoi, lo moun i romark néna dé shoz k’i kol pa, avèk la réalité. Si zot i fèrm zot boush lé bon, mé si zot i fèrm pa, si zot i ézit pa di la vérité zot i koné, lo rakontèr d’zistoir lé riskab ète dékonfi. Alé ! Mi kite azot é mi souète zot i rofléshi la dsi. Sipétadyé.