Matant Zélida la ékrir Justin :
Mon shèr nové, mon spès salté, rouj-de-fon dovan l’éternité,
La mi vé oir la bann la domann lo shanjman. Sak té apré kriy : Hollande ! Hollande ! Mi vé oir azot, apré tousa mové nouvèl nou la lir dann zournal. A komansé par lo pti kou d’pous rikiki lo SMIC la konète, la rotrète soisant-an pou in pti trépé d’moun. Mé sa sé arien ! Pars i sort romarké i mank sète milyar dan la kès pou l’ané 2012. Pou l’ané 2013, baba, vèy pa : so kou isi, i mank trann-troi milyar l’éro. Ousa i sa trouv sa ? Pa sou galé biensir ! Inn i paré i fo rogoumant z’inpo, dé i paré i sava dégrès ankor dan l’anploi piblik. Final de kont, mon nové, Sarkozy té pa lo pli mové prézidan ; Tok ! Pran sa pou toi !

Justin la fé pou répons :
Mon vyé matant k’i koz touzour la boush rouvèr, si ou té i égzis pa, noré di invant aou,
Vi koné bien l’arzan k’i mank koméla, sé l’arzan ké la gaspiy avan... kan la diminyé z’inpo bann rish, kan la défiskaliz bann z’èr siplémantèr soidizan pou goumant l’anploi épi pou done pouvoir d’asha bann Fransé. Rézilta : la anprète l’arzan par balo, épi in zour la romarké lo kont l’Éta lété dann rouj. Té i pas pa d’zour, pa d’somèn san k’gouvèrnman té i anprète par milyar ; Lé pa étonan mésyé Hollande la gingn an l’éritaz in sityasion konmsa... Lé vré, lo Prézidan la fé promès, mé sanm pou moin, li doi komans rogrété pars, li vé, li vé pa, lé riskab dsi bann dépans sosyal li sa tir l’arzan. Par la fote la droite bien antandi. Tok ! Pran sa pou vou !

 Justin