Mézami dopi dann milyé la somenn ni koné néna in siklone i ménass anou épi i ménass Moris galman. La done ali lo nom Belal, in pti nom arab i vé dir dolo pur. Konm zot i koné in siklone sé in bon konm in mové zafèr pou nou.

In bon zafèr pars sa i amenn la plui, mé in mové pars défoi li amenn lo tro d’plui, épi lo van é d’apré sak ni koné bann siklone a partir i sava souf for-san konté défoi néna siklone sèk é sa lé pa gayar pou nou.

Antouléka, ni doi viv avèk bann siklone la. Konm nou lé pti ; siklone i évite anou souvan, tazantan li pass déssi nou é lo rézilta lé pa bon. Si tèlman pa bon ké ni rapèl zot nom épi l’ané zot la passé é mové souvnir zot la lèss pou nou an partan.

Koméla bann sèrvis météo i suiv siklone a la tras.i prévoi mèm kansa siklone va déklaré, i di anou mèm la fors lo van va souflé. Astèr ni atann épi ni roganiz anou pou pa gingn tro gro déga, mé ni koné sa la natir é la fors la natir lé inkontrolab é lo konsékans sé touzour apré ké ni koné.

A bon antandèr salu !

Justin