La mèr lé salé : sa sé in n’afèr ni koné é pa arienk zordi. Final de kont la mèr lé salé de tou tan. Mi souvien, dann mon pti liv léktir l’avé in zistoir-zistoir lo moulin Janik - I paré Janik l’avé in moulin pou fé d’sèl mé in zour lo moulin la moulé a mor, si tèlman Janik té blijé jète ali dann la mèr é lo zistoir té i fini konmsa : dopi tan-la, la mèr lé salé. Mé in zistoir, sé in zistoir é néna lontan l’imanité i fyé pi dsi zistoir. Li fyé dsi in réalité élo réalité lé sak ni koné. Astèr dizon sa in kozman i apèl provèrb é provèrb i dépass son bann mo. Salé, biensir ! sé son kalité prinsipal konm dosik lé do.u Ou na poin pou vanté pou késhoz lé dann out natir mèm out prop natir. Alé ! Mi kite azot pou rofléshi la dsi é ni artrouv pli d’van. Sipétadyé.