Nana in moun lé prémié minis La Frans, kan li la parti fé in bat-karé ofisièl dann péi bann Corse, la di lo péi lé an “cessation de paiement”. Lo prézidan, son koté, la di : « Mi sar pa done sak moin na poin ! ». Donkalor, pou li galman, la kèss lo péi lé vide. Mon kamarad, la pa invant zèf boui, la di amoin, dann in ka kom sa, soi li ashté pi arien, soi li domann in pti krédi la boutik Antoine, soi li fé in pé lo zantiy avèk son vié momon : sète-la i trouv touzour in pti larzan pou li.

Dann gouvèrnman, banna nana bonpé prozé. Koman zot i pé fé ? La i gingn pa aplik lo tik-tak mon kamarad akoz la, i koz par koud’million, sansa koud’miliar. Alor, li la mate in tik-tak : mète in pti taks déssi in nafèr, konmsa va niabou gingn in moné : la sékirité sosial lé an difikilté (sa nou va arkozé !) mète in franshiz déssi médikaman ; bann moniman lé in pé sal-sal, in pé kas-kassé, fé pèy in pti taks bann moun i sava dann gran lotèl ; i fo fé in plan pou la pèsh, donkalor goumante in pti pé lo pri poisson, étsétéra, la ké lo ra.

Donkalor, pou bann moun nana lo pourquoi, i fo tir bann gro biyé. Pou bann ti-kolon, anploy la métod ti-katsou. Oté ! pti bononm, ou in malin ou !

Justin